पंढरपूर : रोपळे (ता. पंढरपूर, जि. सोलापूर) येथे मंगळवारी, ११ एप्रिल रोजी हनुमान जन्मोत्सव व नामकरण सोहळा मोठ्या उत्साहात साजरा झाला. या वेळी महाप्रसाद म्हणून गावजेवणाचे आयोजन करण्यात आले होते. गेली अनेक वर्षे रोपळे ग्रामस्थ एकत्र येऊन हा उत्सव साजरा करतात. अशा प्रकारे साजरा होणारा गावातील हा एकमेव उत्सव आहे.
रोपळे येथील ग्रामदैवत असलेल्या हनुमान मंदिरात जन्मोत्सव सोहळ्यानिमित्त अखंड हरिनाम सप्ताहाचे आयोजन करण्यात आले होते. यामध्ये भजन, कीर्तन, हरिपाठ व ज्ञानेश्वरी पारायण आदी धार्मिक कार्यक्रमांचा समावेश होता. मंगळवारी भल्या पहाटेपासूनच हनुमान जन्मोत्सव सोहळ्यासाठी मंदिरात जाण्याची लगबग घराघरात दिसत होती. कार्यक्रम मंदिरात असला तरी प्रत्येकाच्या दारात सडासंमार्जन करून आकर्षक रांगोळ्या घालण्यात आल्या होत्या. त्यामुळे गावात उत्साह व आनंदाचे वातावरण होते.
सूर्योदयाच्या समयी श्रींच्या मूर्तीवर पुष्पवृष्टी करताच मोठी आतषबाजी करण्यात आली. हनुमान जन्माचे आख्यान घेऊन विश्वंभर महाराज कदम यांनी सुश्राव्य कीर्तन केले. या वेळी श्रींचे बारसेही करण्यात आले. यासाठी मंदिरात आकर्षक फुलांनी सजवलेला पाळणा बांधण्यात आला होता. या कार्यक्रमाला महिला भाविकांनी मोठी गर्दी केली होती. पारंपरिक पद्धतीने पाळणा गाऊन नामकरण विधी पार पडला.
ज्वारीच्या घुगऱ्या, सुंठवडा, डिंकवडा आणि मिठाईचे वाटप करण्यात आले. महाप्रसाद घेण्यासाठी भाविकांच्या मोठ्या पंगतींचे नियोजन करण्यात आले होते. गव्हाची खीर आणि भात-सांबार यांचा महाप्रसादात समावेश होता. बुधवारी (१२ एप्रिल) भारुडाच्या कार्यक्रमाने या जन्मोत्सव सोहळ्याची सांगता झाली.